އެ ގޭގެ ދެންހުރި ބައިގައި މީހަކު އުޅޭނެކަމެއް އޭނާއަށް ކުރީން އެނގިފައެއް ނެތެވެ. ޖެހިލުންވުމެއްގައި ބަނދެވި ދޮރާ ދިމާއަށް ގެއްލިފައި އައިލީނަށް ހުރެވުނީ އެވެ.

——————-

( 21 ސެޕްޓެމްބަރ 2026 ވަނަ ދުވަހުގެ ބަޔާ ގުޅޭ )

ދެ ލޯ މަރައިގެން އިރުގަނޑަކު އޮވެފައި އަރްކާން އަނެއްކާ ވެސް މަގަތަށް އެނބުރިލި އެވެ. ލޯ ހުޅުވާލި އެވެ. ނިތްމަތީ ވައަތް ބާއްވާލި އެވެ. އެގޮތުގައި މިނެޓެއް ނުވެ އެވެ. ނިތްމަތިން އަތް ނަގައި މޭ ދަށުގައި އޮތް ބާލީސް ކައިރިކޮށްލާ ބައްދާލަމުން ދެ ލޯ މަރާލައިފި އެވެ. ނިދަން ބޭނުންވެ ނުނިދިގެން އޭނާ އުޅޭ ކަހަލަ އެވެ. އެންމެފަހުން އޭނާ ފުންމައިގެން ތެދުވެ އެނދު އަރިމަތީ އިށީނެވެ. މޫނުގައި ދެއަތްތިލައިން ފިރުމާލަމުން ފުންނޭވާއެއް ދޫކޮށްލި އެވެ. މިކަމެއްނުވާނޭ އަމިއްލަ ނަފްސަށް ބުނާ ފަދަ އެވެ.

ކޮޓަރިން ނުކުމެ އަރްކާން އައިސް މަޑުކޮށްލީ ބަދިގޭ ކަބަޑުސެޓު ކައިރީ އެވެ. ކޮޓަރީގައި ދިއްލާފައި ހުރި ބޮކީގެ ރިވެލީގައި އެ ކުޑަކުޑަ ސިޓިންރޫމާއެކުވާ ބަދިގެކޮޅުގައި އުޅޭން އަރްކާނަށް އުނދަގުލެއްނުވި އެވެ. އުނދުން ކައިރީ ކަނަކަށްވާހެން ބަހައްޓާފައި ހުރި ކަރަންޓު ފެންކައްކާ ޖަގަށް ފެންއަޅައި “އޮން” ކޮއްލި އެވެ. އެ ކެކުމުން ހޫނު ފެންފޮދެއް ޖޯޑަކަށް އަޅައިލި އެވެ. ބޮވޭވަރަށްވުރެ ފެން ހޫނެވެ. ޖޯޑު ހިފަހައްޓާލައިގެން ކައުންޓަރުގައި ލެނގިލައިގެން ހުރެ އަތުކުރީ އޮތް ގަޑި އަރްކާން ބަލާލި އެވެ. ގޭގެ ދޮރޯށި ހުޅުވި އަޑު އޭނާއަށް އިވުނެވެ. ޠަބީޢަތުގައި ވެސް ވިސްނުންތޫނުކަމާއި ހުސިޔާރުކަން ހުންނަ އަރްކާންގެ ސަމާލުކަން އެ އަޑަށް ދެވުނެވެ.

ފަތިހު ހަތަރެއް ޖެހުމާ ދޭތެރޭ ވަނީ ގާތްގަނޑަކަށް ފަސްވަރަކަށް މިނެޓެވެ. ބޭރަށް ކަންފަތް އަމާޒުކޮށްގެން ހުރި އަރްކާނަށް ދެން އިވުނީ ކުޑަކުއްޖެއްގެ ރުއިމުގެ އަޑެވެ. މާބާރެއް      ނޫނެވެ. އެއާއެކުވެގެން އައި އަންހެނެއްގެ ނާނާގެ އަޑު އިވިލި އެވެ. ބަދިގެ ކައިރިން ފާރުގައިވީ ސުވިޗު އަރްކާން ޖައްސާލި އެވެ. އެއާއެކު މުޅިތަން އަލިވެގެން ހިނގައްޖެ އެވެ. މަޑުމަޑުން އަރްކާންގެ ފިޔަވަޅު ކުޑަދޮރާ ދިމާއަށް އަޅަން ފެށި އެވެ. އެއާއެކު ބޭރުގައި ކުޑަ ކުއްޖާ ގޮވައިގެން ހުރި އަންހެން މީހާގެ ހަރަކާތް އަވަސްވިކަން އަރްކާނަށް ނަގައިގަނެވުނެވެ. އޭނާ އައިސް ކުޑަދޮރު ކައިރީ މަޑުކޮށްލި އެވެ. އެހިނދު ތަޅުދަނޑިތަކެއް ވެއްޓި ތަޅުމުގައި ޖެހުނު އަޑު އިވުނެވެ.

ދެ އިނގިލިން ފަރުދާ ދުރުކޮށްލީ، ކުޑަދޮރުން ބޭރު ކިރިޔާ ފެންނަ ވަރަށެވެ. ކުޑަކުއްޖާ ގޮވައިގެން ހުރި އަންހެންމީހާ އަރްކާނަށް ފެނުނެވެ. އަރިއަކަށް ހުރުމުން ރީތިކޮށް މޫނު ނުފެނުނަސް އޭނާގެ ކޮންމެ ހަރަކާތެއް އަރްކާންގެ ސަމާލުކަން އަތުލި އެވެ. ދޮރުން އެތެރެއަށް އެ އަންހެންމީހާ ވަންނަންދެން ބަލަން އޭނާ ހުއްޓެވެ. އެއަށްފަހު ކުޑަދޮރުގެ ފަރުދާއިން ދޫކޮށްލާފައި އެތެރެއަށް އެނބުރިލި އެވެ. އޭނާގެ ނިތްކުރިއަށް ވަނީ ރޫ އަރާފަ އެވެ. ކޮންމެވެސް ކަހަލަ ދަތި ޚިޔާލުތަކެއް އަރްކާންގެ ސިކުނޑިއާއި ހިތަށް އުނދަގޫ ކުރަނީ އެވެ. އެކަމާ އޭނާ ގަޔާނުވަނީ އެވެ.

ހޫނުފެން ޖޯޑު ބޯލައި އެނބުރި ކޮޓަރިއަށް އަރްކާން އައެވެ. ރޯގާގެ އަސަރު ހުރި ކަރުތެރެއަށް ފަސޭހަކަމެއް ލިބިގެން ދިޔަކަން އޭނާއަށް އިޙްސާސް ކުރެވުނެވެ. އެނދުގައި އިށީންނަމުން އަތުކުރީ ގަޑިއަށް ބަލާލި އެވެ. އޭނާ ޑިއުޓީއަށް ދާންޖެހޭ ގަޑި ވެސް ކައިރިވަމުން އަންނަނީ އެވެ. ހަމަނިދި ނުލިބި ހުރުމުން ކުޑަ ވަގުތުކޮޅަކަށް ވިޔަސް ޖައްސާލަން އޭނާ ގަސްދުކުރި އެވެ. އެހެންވިޔަސް ބޭނުންވީ ހިމޭންކަމެއް އޭނާއަށް ނުލިބުނެވެ.

“ރެޑީވާންވީ ކަންނޭނގެ. އޭރުން ޖިމަށް ވަދެލެވޭނީ.” ވިސްނުމެއްގައި އޮވެފައި އަމިއްލަ ނަފްސަށް އިވޭހާ މަޑުން އަރްކާން ބުނެލި އެވެ.

ކޮޓަރީގެ އެއްފަރާތުގައި ހުރި އަލަމާރި އަރްކާން ހުޅުވާލި އެވެ. ކޮނޑުތައް އަޅުވާފައި ހުރި ދަނޑީގައި ކަވަރާއެކު ދެ ސޫޓު އަޅުވާފައި ހުއްޓެވެ. ގަމީހާއި ޓީޝާޓުތައް އަޅުވާފައި ހުރިއިރު ހީވަނީ އަނދިރިގަނޑެއްހެންނެވެ. ކަޅުކަލަ ގިނައީ އެވެ. އެ އަނދިރިކަމުގެ ތެރެއިން ދެ ހުދު ގަމީސް ފާޅުވާން ހުއްޓެވެ. ފަތްޖަހާފައި ހުރި ހެދުންތަކަށް ބަލާއިރު އެ ވެސް ފެންނަނީ އެހާމެ ތަރުތީބުކޮށެވެ. އެކަމަކު އެ ތަރުތީބު ކަމަކީ އާންމު އިންސާނެއްގެ ފުށުން ފެނުން ނާދިރު ކަމެކެވެ. އަރްކާންގެ އެ ތަރުތީބުކަމަކީ ޚާއްޞަ އުސޫލުތަކެއްގެ އަސްލެވެ.

* * * * *

ޖީބަށް ކޮށްޕާލާފައި އޮތް ފޯނު ނެގި ވަގުތު އައިލީނަށް ކަމެއް ހަނދާންވެ މާޔޫސްކަން އިތުރުވި އެވެ. ދެން ކިހިނެއްބާއޭ ހަދާނީ އޭނާގެ ހިތަށް އެރި އެވެ.

“ސިމް އެއްލާ މިލެވުނީ މާކުރިން… ރިއާ ކީއްވެބާ ނުބުނީ. އަނެއްކާ އަހަންނަށް ނޭނގުނީތަ. ހަނދާނަކަށް އެއްގޮތަކަށް ވެސް ނާދޭ.” ޚިޔާލުތަކެއްގައި ބަނދެވިފައި އައިލީން ހުއްޓެވެ. ޖެހިގެން ހުރި ބައިގައި މީހަކު އުޅޭކަން އެނގޭތީ އައިލީން ހާސްވަނީ އެވެ. އޭނާ އެތަނަށް އައުމުގެ ކުރީން ވާހަކަދެއްކި ކުއްޖާ އެފަދަ ވާހަކައެއް ބުނި ހަނދާނެއް އައިލީން ނުވެ އެވެ. އޭނާ އެހާ ފަސޭހައިން އެ ގެއަށް އަންނަން ނިންމީ އެހެންވެ އެވެ.

އަމާރާގެ ރުއިން ގަދަވެ އެކުއްޖާ ކެރިއޭޖްގައި އިންނަން ވެސް ބޭނުންނުވެ ތެޅިފޮޅެން ފެށި އެވެ. ހުރިހާ ވިސްނުމަކުން އައިލީން އެއްފަރާތް ކުރުވީ އެ ތުއްތު ދަރިފުޅެވެ.

“ޔެސް ދަރިފުޅޫ. މާގިނައިރުވީ ދޯ.” އަވަސްއަވަހަށް ކެރީއޭޖްގެ ވާގަނޑު އެއްފަރާތުން ނައްޓާލައި އެއިން ދަރިފުޅު ނަގަމުން އައިލީން ބުންޏެވެ.

ގޭގައި އިތުރު މީހަކު އުޅުނަސް މިވަގުތައް އައިލީން އެކަމާ ފިކުރުކުރުން ހުއްޓާލީ އެވެ. އެކަމުގައި ދެން އޭނާއަށް ކުރެވޭނީ ވަކި ކޮންކަމެއް ހެއްޔެވެ. ފިކުރުތަކަށް ތަން ދިނުމަށްވުރެ މުހިންމީ އައިލީންގެ އަތުގެތެރޭގައި އިން ދަރިފުޅެވެ. އެކުއްޖާއަށް ވެސް މީ އާ މާޙައުލެކެވެ. ހަށިގަނޑުން ބޭބީ ކެރިއޭޖް ވަކިކޮށްލާފައި ކަނާއަތުން ދަރިފުޅު ހިފަހައްޓާލި އެވެ. އެޕާޓްމެންޓަށް ވަށައިގެން ނަޒަރު ހިންގާލި އެވެ. ހުރިހާ ފާރެއްވަނީ ހުދުކުލައިންނެވެ. ފާރުތަކާއި އިމާރާތުން ވެސް ބާވެފައި ހުރިކަން ފާޅުވެ އެވެ. ފެންލީކުވުމުން ފިނިހިފާކަމުގެ އަސަރު އެއްފަރާތު ފާރުގައި ހުރި ލައްގަނޑުން ދޭހަވެ އެވެ. އެއް ކޮޓަރީގެ ކުޑަ އެޕާޓްމެންޓެކެވެ. ދޮރުން ވަންނައިރު ކަނާއަތް ފަރާތުގައި “ކްރީމީ-ބޭޖް” ކުލައިގެ ބަދިގެ ސެޓެކެވެ. އެއް ކެބިނެޓްގައި އަތްގަނޑު ނުވެސް ނެތެވެ. ވައަތް ފަރާތުގައި އާދައިގެ ދެ ސީޓުގެ ސޯފާއަކާއި އޭގެ ކުރިމަތީ ލަކުޑި ކޮފީމޭޒެއް ހުއްޓެވެ. އެ މޭޒުގެ ކަންތަކުން ހުރީ ކުލަކެހިފަ އެވެ. ކާމޭޒެއް އެތާކު ނެތެވެ. އަނެއްކޮޅުން ބަހައްޓާނޭ ޖާގަ ވެސް ނެތީ އެވެ. އެންމެ ބިއްދޮށަށް ހުރި ދޮރަކީ ކޮޓަރީގެ ދޮރުކަން އައިލީން ނިންމި އެވެ. ބަޔަކު އެތަނުގައި ދިރިއުޅެފައި ހުރިކަމުގެ ނިޝާންތައް ފެންނަން ހުއްޓެވެ. ފެންނަނީ ބޭނުންކޮށްފައި ހުރި ފަރުނީޗަރެވެ. އައިސްއަލަމާރިއަކާއި ދޮންނަމެޝިނެއްގެ އިތުރުން ފަރުނީޗަރު ހުރީ ބޭނުންކުރެވޭ ހާލަތުގައިކަން އެނގުމުން އައިލީނަށް މާބޮޑަށް ވެސް އެތަން ކަމުދިޔަ އެވެ. މިއަދު އޭނާ ފަދަ ނިކަމެއްޗަކަށް ބާވެފައިވާ އެ ކުޑަ އެޕާޓްމެންޓަކީ ހަމައެކަނި ހިޔާވެއްސެއްނޫނެވެ. އުންމީދުތަކާއި ގުޅިފައިވާ ހިމާޔަތެކެވެ. އާ ދިރިއުޅުމެއް ފެށުމަށް ލިބުނު ވަރަށް ބޮޑު ހިތްވަރެކެވެ. ނުވެސް ދަންނަ މީހެއްގެ ފުށުން މިފަދަ ބޮޑު އިހްސާންތެރިކަމެއް ލިބިދާނޭ އައިލީން ހިތަށް ވެސް ނާރަ އެވެ. މާލެގައި ކުއްޔަށް ދިރިއުޅުމަކީ ފަސޭހަ ކަމެއްނޫނެވެ. ތަންތަނުގެ ކުލި އެހާމެ ބޮޑެވެ. ކުއްޔަށް ދޫކުރާ ކަމުގައި ޖަހާފައި އޮތް ނޯޓިސް އޭނާއަށް ފެނުމަކީ ހަމަ ރަޙުމަތެއްކަމުގައި އައިލީންގެ ޟަމީރު ޤަބޫލުކުރެ އެވެ.

ފޫހިވެގެން އުޅޭފަދައިން އަމާރާ ބޮޑާހާކަމުން ދިޔަ އެވެ. ދަރިފުޅު ހުއްޓާލާތޯ އެކުއްޖާއާ ވާހަކަދައްކަމުން އައިލީން އައިސް ބިއްދޮށަށް ހުރި ދޮރު ހުޅުވާލި އެވެ. ކޮޓަރީގެ ބޮކި ދިއްލާލި އެވެ. 8 ފޫޓު 10 ފޫޓުގެ ކޮޓަރިއެއްކަން ޖަހާފައި ހުރި ބޮޑެތި މުށިތަކުން އެނގެ އެވެ. ޑަބަލް އެނދަކާއި ދަމާ ދޮރުފަތުގެ، ދެ ދޮރުފަތްލީ ފުޅާ، އުސް އަލަމާރިއެއް ހުއްޓެވެ. އެއީ ވެސް އާ އެއްޗެހި ނޫންކަން ބަލާލުމުން އެނގޭވަރުވެ އެވެ. ތަންމަތި ތައްޔާރުކޮށްފައި ހުރިއިރު ދެ ބާލީހާއި “ތްރޯ ބްލޭންކެޓް” ފަދަ ރަޖައެއް ބާލީސްތައް ކައިރީ ބާއްވާފައި އޮތެވެ. އަޅާފައި އޮތް ބެޓްޝީޓު އައިލީން ބަލާލި އެވެ. އެއީ އާ އެއްޗެހިކަމުގައި އައިލީންގެ ހިތާއި ޟަމީރު ވެސް އެއްބަސްވެލި އެވެ.

“މިތަން ފަސް ހާހަށްވުރެ ބޮޑުކޮށް ހިފާނެ މީހުންވާނެ… ކީއްވެބާ އެހާ ކުޑަ އަގަކަށް އެ ދިނީ… އަހަރެން މެސެޖުކޮށްލުމާއެކު އަހަރެންނަށް މިތަން ދޭން އެއްބަސްވި… އެހާ ފަސޭހައިން ލިބުނީމަ… ސްޓްޕް އިޓް އައިލީން. ބޭކާރު ކަންކަމާ ވިސްނާ އެއްޗެއްނޫން. ތޭންކްސް ރިއާ. ދިސް އިޒް މޯ ދެން އިނަފް.” ސިއްރެއް ފަދައިން އައިލީން ބުނެލި އެވެ. ސުވާލު އުފެދޭ ކަންކަން ހުއްޓެއްކަމަކު އައިލީންއަށް އެ ހުރިހާ ސުވާލެއްގެ ޖަވާބު މިވަގުތަށް މުހިންމެއްނޫނެވެ.

މުޅިން އާ މާޙައުލެއް ފެންނާތީ އާމާރާ ވެސް ތަންތަން ބަލަން ފެށި އެވެ. އެކުއްޖާގެ ރުއިން މެދުކެނޑުނީ އެހެންވެ އެވެ. ކޮޓަރީގެ ތެރޭގައި ހުރި ފާޚާނާއަށް ބޯދިއްކޮށްލާފައި އައިލީން ބަލާލި އެވެ. އެއީ ހެޔޮވަރުވަރުގެ ފާޚާނާއެކެވެ. ފާޚާނާގެ ދޮރު ލައްޕާލާފައި އައިލީން ކޮޓަރިން ނުކުތެވެ. މުޅި އެޕާޓްމެންޓުން ފެންނަނީ ބޭނުންކޮށްފައި ހުރި އެއްޗެހި ކަމުގައި ވިޔަސް، ހިރަފުހުގެ އަސަރެއް ނެތެވެ. ތަނުން ފެންނަނީ ސާފުތާހިރު ކަމެވެ. ބޮޑަށް ބެލެވެނީ އޭނާ އަންނަންވާއިރަށް އެތަން ފޮޅާ ސާފުކޮށްފައި ހުރީ ހެންނެވެ.

ދަރިފުޅު އުރާލައިގެން ހުރެ އޭނާ އައިސް ދޮރު ކައިރީ ހުރި ދަބަސްތައް ނެގި އެވެ. ސޯފާ ކުރިމަތީ ހުރި ލަކުޑި ކޮފީމޭޒުގެ މަތީ ދަބަސްތައް ބަހައްޓާލި އެވެ. އަމާރާގެ ނެޕީ ބަދަލުކޮށްލަން އޭނާ ހުޅުވާލީ އެ ދަރިފުޅު އެއްޗެހި އަޅައިގެން އައި ދަބަހެވެ. އެކަން ނިންމާލާފައި ދަރިފުޅު މޭގައި ޖައްސާލައިގެން ސޯފާގައި އައިލީން އިށީނެވެ. އެހިނދު ޖެހިގެން ހުރި ބައިގެ ދޮރު ހުޅުވި އަޑު އައިލީނަށް އިވުނެވެ. ހަރިކަށިކަމެއްވެރިވެ މީހާ ސަމާލުކަމަށް އައީ ނިކަން އަވަހާ އެވެ. އެހެން އިންދާ ދެން އިވުނީ ގޭގެ މައި ދޮރޯށި ހުޅުވާ ލެއްޕި އަޑެވެ.

“އޭނާ ދިޔައީތަ؟.” އަމިއްލަ ނަފްސާ އައިލީން ސުވާލުކޮށްލި އެވެ. ހަމަ އެހިނދުން އޭނާއަށް ފުންނޭވާއެއް ދޫކޮށްލެވުނެވެ.

މަޑުމަޑުން ދަރިފުޅުގެ އަޑު ކެނޑި މުޅި އެޕާޓްމެންޓް ހިމޭންވެއްޖެ އެވެ. ނިދިފައި އޮތް ދަރިފުޅު އަތްމައްޗަށް ލައިގެން ސޯފާގައި އިން އައިލީން ޚިޔާލުގެ އޮއެވަރުގެ ބެހެމުންދިޔަ އެވެ. މީ އޭނާ ބޭނުންވީ ފަދައިން ހިންދެމިލަން ލިބުނު ފުރުޞަތުކަން އެނގެ އެވެ. މިހާރު އޭނާ އެ އިނީ ޒަހްރާނާ ވަރަށް ދުރުގައިކަން ޤަބޫލުކުރެވެ އެވެ. އެހެންވިޔަސް އައިލީނަށް ހިތްހަމަޖެހުމެއް ނުލިބުނެވެ. ދުނިޔޭގެ ޙަޤީޤަތާ ކުރިމަތިލާން ޖެހޭތީ އެވެ. ސަލާމަތް ހޯދުމަށް ފިލަން ދުވެވިދާނެ އެވެ. އެއީ ކުރެވިދާނެ ކަމެއްކަމާއި އަދި އެންމެ ފަސޭހަ މަރުހަލާކަން އައިލީނަށް އެނގިއްޖެ އެވެ. އެކަމަކު ދެން އޮތީ ކަޑަތުކުރަން އުނދަގޫ މަރުހަލާ އެކެވެ. ދިރިހުންނަން މަސައްކަތް ކުރުމުގެ މަރުހަލާ އެވެ. އައިލީނަކީ އެކަނި ހުރި ނަފްސެއްނޫނެވެ. ތުއްތު ފުރާނައެއްގެ ޒިންމާ އެޅިފައިވާ މައެކެވެ. ދަރިއަކަށް ޓަކައި މަޔަކު ކޮންމެފަދަ ގުރުބާނީއެއް ވެސް ވެދާނެ އެވެ.

އަތުގައި ހުރި ފައިސާކޮޅު ހުސްވުމުން ދެން ހަދާނީ ކިހިނެއްކަމެއް އައިލީންގެ ސިކުނޑިއަކަށް ނާދެ އެވެ. ވަޒީފާއެއް ނެތްތަނުގައި އާމްދަނީ ލިބޭނޭ އިތުރު ގޮތެއް އައިލީންގެ ނެތެވެ. އޭނާގެ ފަހަތުގައި ޢާއިލާއެއްގެ ހިޔާވެހިކަމާއި ތަނަވަސްކަމުގެ ޒަރެއް ވެސް ނެތެވެ. މަދަދުވެރިވާނޭ ހީކޮށް އެ މީހެއްގެ ކައިރިޔަށް ދެވޭނީ އެފަދަ ރައްޓެއްސާ ހިސާބު ވެސް ހުރިއްޔާތާ އެވެ. އެގުޅުމެއް ވެސް މިއަދު ނެތެވެ. މުޅި ދުނިޔެއާ ކުރިމަތިލާން ހުރީ އޭނާ އެކަނިމާ އެކަންޏެވެ.

އަޅުވެތިކަމުގެ އެ ދޮރުފަތުން އައިލީން ނުކުތީ އަމިއްލަ ނަފްސަށް ވަޢުދުވަމުންނެވެ. ދެ އަތުގެ ތެރޭ އޮތް ދަރިފުޅު ހެކިކޮށް އެކުއްޖާގެ މުސްތަޤްބަލަށް ޓަކައި ވިޔަސް، ދެން އޭނާ އެނބުރި ޒަހްރާންގެ ގާތަށް ނާންނާނެ އެވެ. މުޅި އުމުރަށް ސަލާމެވެ. އޭނާއަށް ގޮތް ހުސްވެ މީހުން ގާތުން ސަލާން ޖަހަން ޖެހުނަސް ޒަހްރާނުގެ ގާތަށް ދާން ބޭނުންނޫނީ އެވެ. އެއީ އޭނާގެ އަޒުމެވެ. އައިލީނަށް ކަމެއް ޔަޤީންވާތީ އެވެ. ދެން އޭނާ އެނބުރި ހިނގައްޖެނަމަ، ޒަހްރާނުގެ ކިބައިން މިނިވަންވެ، ސަލާމަތުން ނެރެން އޮންނާނީ ހަމައެކަނި އޭނާގެ ފުރާނަނެތް މަސްގަނޑެވެ.

ހިތުގެ އުދާސްކަމާއި ފިކުރުގެ ތެރެއިން ކުރި ހޯދީ ވަރުބަލި ކަމެވެ. ތާއްޔާ ޖެހިލި އައިލީން ސިހުނެވެ. ދަރިފުޅު ނުވެއްޓުނީ ކިރިޔާ އެވެ. އަވަސްއަވަހަށް އަމާރާ މެޔާލާ ބޮޑިކޮށްލަމުން ސޯފާއިން ތެދުވި އެވެ. އެހެންވިޔަސް ކޮޓަރިއަށް ގޮސް އެނދުގައި އޮށޯންނާކަށް އޭނާއަށް ނުކެރުނެވެ. ދެކޮޅަށް ދަރިފުޅު ގޮވައިގެން ހިނގަހިނގާފައި ސޯފާ ކައިރިއަށް ގުދުވެލި އެވެ. ރީތިކޮށް ސޯފާގައި އަމާރާ ހަމަޖައްސާލާފައި އެދިމާ ތަޅުންމަތީ އައިލީން އިށީނެވެ. ދަރިފުޅުގެ ގައިމަތީ އެއްއަތް ބާއްވާލައިގެން ސޯފާގެ އަރިމަތީ ބޯ ބާއްވާލައިގެން އޭނާ އިނެވެ. ފައިކުރުކޮށްލައިގެން މީހާ ކުޑަވެލައިގެންނެވެ. އިތުރަށް ނެރޭނޭ ހަކަތައެއް އެ ހަށިގަނޑުގައި ނެތް ފަދައަކުން، އަމިއްލަ އިޙްތިޔާރުން ބޭރުގައި، މަޑުމަޑުން އެ ދެ ލޯ މެރިއްޖެ އެވެ.

* * * * *

އިރުއޮއްސެނިކޮށް ގެއަށް އައިސް ފެންވަރާލައިގެން ނުކުތް ގޮތަށް އަރްކާން އަނެއްކާ ވެސް ދިޔައީ ބޭރަށެވެ. އޭނާގެ އަމިއްލަ ކަމެއްގައި މީހަކާ ބައްދަލު ކުރާށެވެ. އޭނާ އެނބުރި އައީ ރޭގަނޑު ދިހައެއް ޖަހަން ކައިރިވެފައި ހުއްޓެވެ. ގޭގެ މައިދޯރާށި ހުޅުވާލުމާއެކު ފުރަތަމަ ވެސް އަރްކާންގެ ކަންފަތުގައި ޖެހުނީ ތުއްތު ކުއްޖެއްގެ “ތޫލި” ހަޅޭކެއްގެ އަޑެވެ. ރުއިމަށްވުރެ ހީވަނީ ސަކަރާތް ޖަހަނީ ހެނެވެ. ވަގުތުން އޭނާއަށް ދެ ބުމަ ކައިރިކޮށްލެވުނެވެ. އޭނާގެ ދިގު އިސްކޮޅާއެކު ގޭގެ ދޮރޯށިން ވަންނަން ބޯތިރިކޮށް ގުދުވެލަން ޖެހުނެވެ. ވައަތުގައި ބޮޑު ސިޓީއުރައެއް އޮތްއިރު އަނެއް އަތުން އެޕާޓްމެންޓަށް ވަނުމަށް ތަޅުދަނޑި ޖަހާލި ވަގުތު ޖެހިގެން ހުރި އެޕާޓްމެންޓްގެ ދޮރުގެ ތަޅުގައި އެތެރެއިން މީހަކު ހިފާލިއަޑު އަރްކާނަށް އިވުނެވެ. އޭނާގެ ނަޒަރު އެ ދިމާއަށް ދަތުރުކޮށްލި އެވެ. ދޮރުދަށުން ފާޅުވާން ހުރި އަލިކަމުގެ ތެރެއިން އެތަނުގައި މީހަކު ހުރިކަމުގެ ހިޔަނި ފެންނަން ހުއްޓެވެ. އިރުކޮޅަކު ބަލަން ހުރެފައި އެކަމަށް މާބޮޑު ސަމާލުކަމެއް ނުދީ އަރްކާން އެތެރެއަށް ވަނީ އެވެ.

އަވަހަށް ނިދާފައި ފަތިހާ ހޭލުމަކީ އަރްކާންގެ ބޭނުންވާ ގޮތެވެ. އެނދުގައި އޭނާ އޮށޯތީ ނިދާށެވެ. އެއާއެކު އަރްކާންގެ ޟަމީރު ހަނދާންކޮށްދިނީ އޭނާގެ ހިމޭން ދިރިއުޅުން ނިމުމަކަށް އައިސްފިކަމެވެ. ކުޑަކުއްޖެއްގެ ހަޅޭކާއި، އޭނާގެ ރުއިމަކީ އަރްކާނު ތަޙައްމުލް ކުރަން ޖެހިފައިވާ މިއަދުގެ ހާލަތެވެ. އުނދަގޫވިޔަސް، ޝަކުވާކުރެވޭކަށް ނެތެވެ.

* * * * *

ދެތިން ފަހަރަށް ދޮރު ހުރީ ތަޅުލެވިފައިތޯ އައިލީން ބަލާ ޔަޤީން ކުރި އެވެ. ދެން އައިސް ސޯފާގައި އިށީނެވެ. މުޅި ދުވަސް ނިމިގެންދިޔައީ އެވެ. އެޕާޓްމެންޓްގެ ތެރެއިން ޓީވީގެ އަޑެއް ނީވެ އެވެ. ހަމައެކަނި އިވެނީ އައިލީންގެ އަމިއްލަ އަޑާއި އަމާރާ ލައްވާ އަޑުތަކެވެ. ހިތްނުތަނަވަސް ކުރުވާ ހާސްކަން އައިސް އައިލީން ބައްދާލައި ނޭވާ ހާހެއް ނުކުރުވަ އެވެ. އެހެންނަމަވެސް ގެންފައި ހުރި ބިރު އިރުއޮއްސުމާއެކު އިތުރުވީ ބޭއިޚްތިޔާރުގަ އެވެ. ކޮންމެ ވަގުތެއްގައި ވެސް އޭނާގެ މި މިނިވަންކަން ނިމުމަކަށް އައިސްދާނޭ  ހީވަނީ މާބޮޑަށެވެ. ބިރަކީ މީ ސަލާމަތްވާން ހާދަ އުނދަގޫ އެއްޗެކޭ އައިލީންގެ ހިތަށް އެރި އެވެ. ދެ ލޯ ފެންކަޅިވާން ފެށީ އައިލީންގެ ގަސްދަކާނުލަ އެވެ.

“އަހަރެން ރުއީމަ ކިހިނެއްވާނީ. އަމާރާއަށް ޓަކައި އަހަރެން ވަރަށް ހިތްވަރު ކުރަން ޖެހޭނެ. މީ އަދި ފެށުން.” ރުއިމަކީ ބަލިކަށިކަމެއް ކަމުގައި ވިސްނި އައިލީން އަމިއްލަ ނަފްސު ހުއްޓުވި އެވެ. ދެ ލޮލަށް ޖަމާވާންފެށި ކަރުނަތައް ހިންދާލީ މަޖުބޫރުންނެވެ. އޭނާއަށް ނޭނގެނީ ރުއިމުގައި ވެސް ހިތާއި ނަފްސަށް، އޭގައި ފިނިކަމާއި ފަރުވާއެއް ވާކަމެވެ. ހިތްވަރު ކުރުމަކީ މީހާ އިޙްސާސެއްނުވާ ހިލަގަނޑަކަށް ވުން އެކަންޏެއްނޫނެވެ. އަމިއްލަ މީހާގެ ނަފްސާނީ ދުޅަހެޔޮކަމަށް ޓަކައި، ޖަޒުބާތުތަކާއި ކުރިމަތިލާން އޭނާ ދަސްކުރަން ޖެހޭކަން އައިލީންއަށް އަދި ނޭނގެނީ އެވެ.

ތަޅުންމަތީ އޮތް މެޓުގައި އަމާރާ އޮތެވެ. އެކުއްޖާގެ ކައިރީ އޮތް ތަޅުވާ ކުޅޭ އެއްޗާއި އޭނާ ކުޅެނީ އެވެ. އައިލީންގެ ނަޒަރު ހުރީ ދަރިފުޅަށް ހުއްޓިފަ އެވެ. އެ ދަރިފުޅަކީ އޭނާގެ ދިރިހުރުމެވެ. ހިތާއި ނަފްސަށް ލިބޭ ހަމައެކަނި ހިތްހަމަޖެހުމުގެ އަސްލެވެ. ސޯފާއިން ތެދުވެގެން އައިސް ދަރިފުޅުގެ ގާތުގައި އައިލީން އިށީނެވެ. އެކުއްޖާގެ ނިތްކުރިމަތިން އިސްތަށިކޮޅު ރީތިކޮށްލި އެވެ. މަންމަގެ އެ ލޯބިވެތި ބީހުން އެކުއްޖާއަށް ފާހަގަވީ ފަދައިން ބަލާލައި ހިނިތުންވެލީ ސޮނިތަކާއެކު އެވެ. ތުންފަތް ދެމިލީ ބޭއިޚްތިޔާރުގައި ވިޔަސް، އެ މައުސޫމް ލޯބިލޯބި ހިނިތުންވުން އައިލީންގެ ހިތަށް ތަދުކުރި އެވެ. އެކުއްޖާގެ މުސްތަޤްބަލު ތަސައްވުރުކުރަން ނޭނގޭތީ އެވެ.

“ވީ އާ ގޮއިންޓު ބީ ފައިން… ވީ އާ އޯކޭ…” އަމާރާގެ ބޮލުގައި ފިރުމާލަމުން އައިލީން މަޑުމަޑުން ބުންޏެވެ. ޙަޤީޤަތުގައި އެއީ ޚުދު އޭނާގެ އަމިއްލަ ނަފްސަށް ދިން ޔަޤީންކަމެއް ކަހަލަ އެވެ. އެ ލަފުޒުތަކަކީ އޭނާގެ ހަޔާތާ ބީރައްޓެހި ލަފުޒުތަކަކަށް ވިޔަސް ތަކުރާރުކޮށް ކިޔާލި އެވެ. އަމިއްލަ ޟަމީރު ގާތު ޤަބޫލުކުރާށޭ އެދޭ ފަދައިންނެވެ. އައިލީން ހުރީ ކޮންތާކުކަން ޒަހްރާނަށް ނޭނގޭނެކަން އެނގެ އެވެ. އެ ޚިޔާލުން އެކަނި ވެސް އައިލީނަށް ނޭވާލާން ތަންފުކެއް ފަސޭހަވެއްޖެ އެވެ.

އަމާރާ ނިންދެވުމަކީ ހަނގުރާމައެއް ކުރުން ފަދަ ކަމެކެވެ. ބުއްފުޅި ދީފައި އެކުއްޖާ ނިދާތޯ އައިލީން އުޅުނެވެ. ގަޑިތަކުން އެގާރަ ޖެހުމާ ކައިރިވެފައި ހުރީމަ އެވެ. ކުރީން ވެސް އެކުއްޖާ ނިންދަވަން އައިލީން މަސައްކަތް ކޮށްފި އެވެ. ކޮންމެ ފަހަރަކު ރޯން ފަށަނީ އެވެ. ގޮތްދޫނުކޮށް އައިލީން ދަރިފުޅު ގޮވައިގެން ދެކޮޅަށް ހިނގާލަހިނގާލަ ހުއްޓެވެ. އެންމެ ފަހުން އެކުއްޖާ އާފުރެން ފަށައިފި އެވެ. ދެ އަތުން މޫނާއި ލޮލުގައި އަތްއުނގުޅަން ފެށި އެވެ. ގިނައިރެއްނުވެ ދެން ފެނުނީ ހިމޭންކަމާއެކު ނިދީގެ އަރާމުކަމުގައި އަމާރާ އޮތްތަނެވެ. އެ މަންޒަރުން އައިލީނަށް ފުންނޭވާއެއް ދޫކޮށްލެވުނެވެ. އޭނާ ވެސް ހުރީ ވަރުބަލިވާގޮތް ވެފަ އެވެ.

މުޅި ދުވަސް ނިމިގެން ދިޔައިރު އައިލީން ހަރަކާތްތެރިވަމުން އެ ދަނީ ފެންކޮޅެއްގައި ކައްކާލި ނޫޑުލިސް ކޮޅެއް ކާލައިގެންނެވެ. އޭނާ ބަނޑުހައި ވެސް ނުވަނީ އެވެ. އެއީ އޭނާ ގެއިން ނުކުންނަމުން ދަބަސްތެރެއަށް ލީ ދެ ހަތަރު ޕެކެޓު ނޫޑުލީހުން އެއް ޕެކެޓެވެ. ރޭ ފަތިސް ވަނިކޮށް އައިސް އެ އެޕާޓްމެންޓަށް ވަން ގޮތަށް އަދި އޭނާ އެތަނުން ނުނިކުމެވެ. ނުކުންނަން ޖެހިލުންވަނީ އެވެ. ނަފްސު ހަމައަކަށް އެޅެން ވަގުތު ބޭނުންވަނީ އެވެ.

ސިއްރު ފިޔަވަޅުތަކާއެކު އައިލީން ކޮޓަރިއަށް ވަނެވެ. އެނދުގައި އަމާރާ ބާއްވާލަން ގުދުވެލި އެވެ. އެކުއްޖާގެ ހަށިގަނޑު ކިރިޔާ ތަންމަތީގައި ޖެހިލީ އެވެ. އެ ރޯންފެށީ އެވެ. އިންތިހާ ދަރަޖައިގެ މާޔޫސްކަން އައިލީންގެ މޫނުން ފާޅުވެލި އެވެ. އޭނާ ގަސްދުކުރީ ދަރިފުޅާއެކު އެނދުގައި އޮށޯވެލާށެވެ. ނަމަވެސް އެނދުގައި އަމާރާ ނޯތެވެ.

“ދަރިފުޅު ޕްލީޒް… ދެން ނުރޮއެ ނިދާލަބަލަ… ތިއުޅެނީ ވަރުބަލިވެގެންނޭ. ޕްލީޒް ދަރިފުޅު. އަވަހަށް ހުއްޓާލާފައި ނިދާލަން ހިނގާ. ދިސް އިޒް އަވަރ ހޯމް ނައު.” ވަގުތުން އަމާރާ ގޮވައިގެން ހަށިގަނޑު ތެދުކޮށްލި އައިލީން ލޯތްބާއި އާދޭސް އެކުލެވޭ ރާގެއްގައި މަޑުމަޑުން ބުނެލި އެވެ. އަމާރާ އެގޮތަށް ރޮނީ ކީއްވެކަމެއް އައިލީނަކަށް ނޭނގެ އެވެ. ދަރިފުޅު ހުއްޓާނުލާ ގިނައިރުވާން ފެށުމުން އޭނާގެ ހިތުގެ ތެޅުން އަވަސްވި އެވެ. ޒަހްރާންގެ ހަނދާންތަކުންނެވެ.

އަމާރާގެ ރުއިން ގަދަވަމުން ދިޔަވަރަކަށް އައިލީންގެ ނަފްސު އެ އަޑުގެ ތެރޭ ގައިދުވަމުން ދިޔަ އެވެ. ގަޑި ދެގަޑިއިރަށް ބަދަލުވެ ދިޔައިރު ދަރިފުޅު ގޮވައިގެން ދެކޮޅަށް ހިނގަހިނގާ އައިލީން ވަރުބަލިވެ ގޮތް ހުސްވެއްޖެ އެވެ. މޭގައިވީ ހިތް ނެގިނެގިފައި ޖެހޭއިރު އައިލީންގެ ކަންފަތަށް ޒަހްރާނުގެ އަޑު އިވޭ ފަދަ އެވެ.

“ބޭބީ… ކިހިނެއް ހަދައިދޭންވީ…” ރޮވެން ކައިރިވެފައި ހުރި ފަދައަކުން އައިލީނަށް ބުނެވުނެވެ. އެހެންވިޔަސް އަމިއްލަ އިޙްސާސްތައް އެ ތުއްތު ކުއްޖާއަށް ކިޔާދެވޭނެ ހެއްޔެވެ. ގިނައިރަކު އައިލީނަށް އަމިއްލަ ނަފްސު ނުހިފެއްޓުނެވެ. އޭނާއަށް ވެސް ރޮވެނީ އެވެ. ސިކުނޑިއާއި ހަށިގަނޑުގެ ވަރުބަލިކަން އިންތިހާ އެވެ. އަނެއްކޮޅުން ދަރިފުޅަށް ވާގޮތެއް ނަގައިގަންނަން ނޭނގޭތީ، ޒަހްރާނު ބުނާ ފަދައިން އަމިއްލަ މީހާގެ އުނިކަމެއް ހުރިއްޔޭ އައިލީނަށް ޤަބޫލުކުރެވެނީ އެވެ. އޭނާގެ ހިތްވަރު އެލި ނަފްސު ބަލިކަށިވަމުންދިޔަ އެވެ. ވަސްވާހުގެ ޚިޔާލުތައް ކަތުރުފަނިތަކެއް ފަދަ އެވެ.

ކުއްލިއަކަށް އިވިގެން ދިޔައީ ކޮޓަރީގެ އެއްފަރާތު ބިތުގައި ޖެހި އަޑެވެ. ދެން ނިކަން ބާރަށް ފިރިހެނެއްގެ “ޗަސް” ޖަހާލުމުގެ އަޑު އައެވެ. އެއާއެކު އައިލީން އެއްކޮށް ގަނޑުވެއްޖެ އެވެ. ދުރަށް ނުގޮސް، އައިލީނަށް ފުރައްސާރަކުރަމުން އައި ބިރުވެރިކަން، ފިނިފެން އެއްޗެއް އޮއްސާލި ފަދައިން އޭނާގެ ގަޔަށް އޮހިގަތީ އެވެ. ހަރުކަށިކަމެއް ވެރިވެ ހުރިހާ ލޯލިތަކެއް ކޮޅަށް ޖެހުނީ އެވެ. އެއީ ޖެހިގެން ހުރި އެޕާޓްމެންޓުން އައި އަޑެކެވެ. އައިލީން ހީކުރީ ދެ އެޕާޓްމެންޓް ވަކިކޮށްފައި ހުރީ ހުދު ފާރަކުން ކަމަށެވެ. އެ ދެމެދުގައިވަނީ ފިލައިގެ ޕާޓިޝަން އެއްކަން އެނގުނީ އަދިކިރިޔާ އެވެ. ފާރެއްގައި ޖެހިޔަސް އެހާ ބާރަކަށް ނީވޭނޭކަން އައިލީނަށް ވެސް އެނގެ އެވެ.

( ނުނިމޭ )